nalabbaga a sippit

nu kasanu ti kinapuspustura ti pilipino, nakarkaro manen dagiti tagaditoy.

dagiti lallaki duray nu haan da nga nagdigos, umanayen nga agdiram-os da ken basaen da bassit ti buok da tapno nalaka a sagaysayen ken limpiyoen. ti bado da met nga haan nga nasukatan ket tartarimaanen da nga ikawes – kasla mas dillawen da ti buya na, haan nga ti angot na. ayna, nu maangot mo lang ti pay-od na kua.  naminsan nga naawanan ti napudot nga danum ti lima nga aldaw – manipud lunes inggana’t biyernes, lima nga aldaw met a sabali ti angot ti opisina mi. ngem bilib ka ta kasla nadalus met latta ti langlanga da. aglalo ta napupudaw da gamin.

dagiti babbai, uray no kasano ti kasasaad ti biag ken trabaho, adda latta met mabalinda nu ti kolorete ti pagtutungtungan. simple nga t-shirt ken jogging pants ti suot da nga agdalus, ngem madlaw mo ti pulbo ti rupa ken nalabbaga a sippit da. agtutubo man wenno nataenganen ket agsuot da latta ti nagngangato a heels ti sapatos.  nu apay met nga uso ditoy ti nagtitirad a sapatos – lalaki man wenno babai. pinadas ko met ti agsuot ti sapatos da ta awan met la unay ti pagpilian a kas diay ‘pinas. mayat met gayam. rinnuaman laeng. kuna dagiti gagayyem ko, kasla ak met laeng mongolianen. ikatawak laeng.

siguro maigapu iti klima da metten isu nga nadumaduma met ti us-usaren da a kawes. nu kapudutanna, agruar dagit ababa ken aglikba nga badbado dagiti babbai. ay, ket dumakkel met dagiti bukel ti matam ken agkatay ka pay a makakita kadagiti nadumaduma a langa ni eba nu kasta ti porma da. awan pakawanen da nga estilo ti naseksi wenno nasiksik a porma. ti importante ket maisuot da ti kaykayat da.

agsubli ta iti sapatos da. adu ti agkaiwara nga shoe-shine boys/men iti kalsada. adda pay iti shoe polishing machine kadagit entrada ti dadakkel nga opisina. black or brown. agpili ka. mabalin nga daanen ti sapatos ngem haan nga balen basta nasileng. 

1 Comment(s)

Comments RSS TrackBack Identifier URI